ဘီဘီစီနဲ့ ဂျိုရွှာဝေါင်း

ဘီဘီစီနဲ့ ဂျိုရွှာဝေါင်း
ဘီဘီစီ (World Service) က သတင်းကြေညာသူက ဟောင်ကောင်က ဂျိုးရွှာ ဝေါင်းကို အင်တာဗျူးတာလေး ကြည့်ရတယ်။ သိတဲ့အတိုင်း လာမယ့် တနင်္ဂနွေမှာ လုပ်မယ့် လူထုချီတက်လမ်းလျှောက်မယ့် ကိစ္စ။ ဂျိုးရွှာ ဝေါင်း ကတော့ သူ့ကို ဖမ်းထားလည်းပဲ၊ ဆန္ဒပြပွဲကို ခွင့်မပြုရင်လည်း စီစဉ်ထားတဲ့အတိုင်း ဆက်လုပ်မှာပဲ တဲ့။
 
အဲ့ဒီမှာ ဘီဘီစီက "ဂျိုးရွှာ ဝေါင်း၊ ခင်ဗျားအနေနဲ့ ဒီလှုပ်ရှားမှုရဲ့ ဦးဆောင်သူ မဟုတ်ဘူးလို့ ဘယ်လောက်ပဲ ပြောပြော လူတွေကတော့ ခင်ဗျားလုပ်တာတွေ ပြောတာတွေအတိုင်း လိုက်လုပ်ကြမှာပဲ၊ ဆိုတော့ ခု ရဲက ခွင့်မပြုဘူး၊ ခင်ဗျားတို့က ဆက်လုပ်မယ်ဆိုရင် ခင်ဗျားက လူတွေကို ဒုက္ခေရောက်စေမှာမဟုတ်ဘူးလား" တဲ့။ ဆိုလိုတာ ခေါင်းဆောင်ဖြစ်တဲ့အတွက် ခင်ဗျားဒါကို တာဝန်ယူရမယ် လို့ ဘီဘီစီက ဆိုလိုတာ ဖြစ်တယ်။
 
ဒီနေရာမှာ မြင်မိတာက တယောက်ယောက်၊ တဖွဲ့ဖွဲ့ကို အတင်းကြီး တာဝန်ယူ၊ ခေါင်းခံပစ်စေချင်တဲ့ ပုံစံတခု မြင်မိတယ်။ "မင်းက ဘယ်လိုပဲငြင်းငြင်း ခေါင်းဆောင်ပဲ၊ ဒါကြောင့်ဒါကို တာဝန်ယူရမယ်" လို့ ဆိုလိုတာပေါ့။ တဖက်မှာ တခြားအဓိပ္ပါယ်တခု ရှိဦးမှာ ဖြစ်ပေမယ့် တော်ရုံလူဆို "ဟုတ်သားပဲဟ၊ ငါက ခေါင်း‌ဆောင်ပဲ" ဆိုပြီး နားထင် သွေး ရောက်သွားနိုင်တယ်။ ‌
 
ကျနော်တို့ဆီက ဟိုအရေး၊ ဒီအရေး ဆောင်ရွက်နေသူ အတော်များများဟာ နိုင်ငံရပ်ခြား သတင်းမီဒီယာတွေ၊ အဖွဲ့အစည်းတွေရဲ့ သမုတ်ပေးမှု၊ မြှောက်ပေးမှုကြောင့် ကိုယ့်ကိုယ်ကို လူတန်းစား တခုခု၊ လှုပ်ရှားမှုတခုခုရဲ့ ခေါင်းဆောင်၊ ရှေ့ဆောင်ဦးရွက်ပြုသူ စသဖြင့် သူတပါးကပ်ပေးတဲ့ တံဆိပ်တခုအောက် အတင်းကြီး ဝင်ပြေးကပ်ပြီး နာမည်ယူပစ်လိုက်ကြတာ တွေ့ရတယ်။
 
ထားပါလေ။ ပြောချင်တာက ဂျိုးရွှာ ဝေါင်း ပြန်ပြောတာလေးက သဘောကျစရာ ကောင်းတယ်ဆိုတာပါ။ နိုင်ငံရေး ခံယူချက်တွေ၊ သဘောတူမှု၊ လက်ခံနိုင်/လက်မခံနိုင်မှုတွေကို ဘေးဖယ်ပြီး ကြည့်မိတာပေါ့။
 
ဘီဘီစီ သတင်းကြေညာသူကို "ခင်ဗျားအနေနဲ့ ဟောင်ကောင်ရဲ့ လက်ရှိနိုင်ငံရေး သဘောသဘာဝကို သိပ်မသိသေးဘူး ထင်တယ် (You might not be familiar with current political context in Hong Kong) တဲ့။ "ခုက ဘယ်သူက ခေါင်း‌ဆောင်၊ ဘယ်သူက နောက်လိုက်ဆိုပြီး ရှိနေတာ မဟုတ်ဘူး။ လူတိုင်းဟာ ခေါင်းဆောင်ပဲ။ လူတိုင်း ကိုယ့်တာဝန် ကိုယ်ယူနေကြတယ်" တဲ့။
 
အကြောင်းအရာထက် သူ ပြန်ပြောတဲ့ အခြေအတင်ပုံစံ‌လေးကို သဘောတွေ့မိလို့ပါ။


About Mratt

သတင်း၊ ဆောင်းပါးနဲ့ ဖန်တီးစာတွေ ရေးတယ်။ စာရေးခြင်းနဲ့ပဲ အသက်မွေးဝမ်းကျောင်းပြုတယ်။ ကဗျာတွေကို ချစ်တယ်၊ ဂစ်တာ နည်းနည်း တီးတယ်။ Blues ကို သစ်ရွက်ခြောက်တွေကြား ခံစားတယ်။ ရံဖန်ရံခါ Heavy Metal တွေ နားထောင်တယ်။ Fixed Gear စက်ဘီး စီးတယ်။ ဘာသာတရားကိုးကွယ်မှုကို လေးစားပေမယ့် မယုံကြည်ဘူး။